Kryeministri i Kosovës, Albin Kurti në një intervistë për gazetën zvicerane “Blick” është pyetur edhe për futbollistët kosovarë që luajnë në Zvicër dhe veprimin e Granit Xhakës, i cili e veshi fanellën me mbishkrimin “Jashari”, duke iu referuar mbiemrit të komandantit legjendar, Adem Jashari.

Kurti u pyet se a pajtohet me “deklarata të tilla politike” në fushën e futbollit, teksa tha se nëse dikush e nderon identitetin e vet, pajtohet me këtë.

“Varet. Mendoj se deklaratat kundër racizmit janë të drejta dhe të rëndësishme dhe nëse dikush e nderon identitetin e vet, kjo është mirë edhe për mua”, ka thënë Kurti.

Kryeministri u pyet se a kishte ndonjë porosi për Granit Xhakën, Xherdan Shaqirin dhe shokët e tyre, dhe përgjigja e tij ishte: “Faleminderit për frymëzimin e aq shumë talentëve të rinj për të luajtur futboll, edhe në Kosovë.”

Kujtojmë se gjesti i Xhakes me fanellen e Jasharit bëri bujë të madhe në media. /arbresh.info/